團派
今日要派兩場利是呀。
第一場係大學同學。
地點係荃灣。
唔記得係咪呢次出荃灣出事呢。
搭 40x 去城門隧道轉車。
落左車行前 d 準備轉車。
我見到有車，拉住柴仔話「快 d 啦，有車呀」。
好在柴仔好清醒，因為我拉緊佢去趕架 40x，哈哈。
又俾人笑笨蛋啦~
第二場係 E 記同事。
又係玩射龍門，好以每年一次賀歲盃咁。
賭錢我唔玩，我做派牌。
佢地玩到搭人地果 round 黎買。
黑仔王龍門超闊都撞柱，又成日搭沈船，笑到我死。
Labels: 工場 E, 書友仔 U
柴的電腦
今日行程緊湊。
先去買褂鞋。
呢個項目我冇乜要求，去返旺角樓梯底好出名果間度買。
呢間野都幾犀利喎，我諗有蒲 ESDlife 既人都會識。
真係好快，十五分鐘都唔知有冇就走得。
下一站去 Trinice 揀花。
上到去佢有再介紹架，不過免得花多眼亂，要返之前自己揀好果 d 款。
花球
俾四大長老既襟花
俾家姐姐夫哥哥同佢女友既襟花
俾兄弟姐妹既襟花手花
彷彿係一系列咁架，因為個個都有 d 白色小花！
約左亞生拿茶具。
佢實在太好人喇！
幫我向大陸買茶具，有平貨之餘，我仲可以慳返 d 車錢。
再下一站就係黃金。
今次到買柴仔既電腦。
不過佢唔好彩，個 case 向平果間冇貨，要去第間買貴 15 蚊，LCD 又冇左 惠康 coupon 送。
大袋細袋返新居砌機。
又遇到困難喇！
SATA 頂住個火牛，搞好耐加夾粗黎先整到。
柴仔仲整到流血都唔知，我見到個機有血，佢先發現原來係佢流緊......
夜晚仲要招呼 E 記既朋友仔黎參觀。
呢班野唔賭唔舒服，不過我乜都冇，得好益智既 UNO。
哈哈，所以都冇坐好耐就散 lu~
好充實呀~
Labels: 一片瓦, 婚紗禮服, 工場 E, 星期三緊, 花球
香港公園
午飯，同檯有一對母子。
個媽媽將麵包上面"loan"左既部份刮落檯面，搞到檯面"撈咁搞"。
個仔仔同佢講道理，話佢咁做唔岩，個媽媽仲係咁反駁。
睇到成個過程，柴仔話呢個媽媽有呢個仔真係三生有幸。
去亞東同阿嬌既婚宴之前，柴仔同左我去香港公園影相！
我提議果陣，柴仔又話我傻。
結果佢都係有帶到相機出黎，仲帶埋腳架 tim 呀！
可以影多 d 兩個人既相喇！
好開心~
柴仔真係好抵錫！
Labels: 劃火柴, 工場 E
Aunty~
Noffy 下個月結婚喇！
我地班姐妹兵團又出動！
首先去食個靚飯。
Noffy 揀左我擺酒間酒樓 lunch，好細心呢~
五個女人飲茶，講下八婆野，感覺好得意。
食飽飽揀姐妹衫。(肚腩好大)
經過上次長裙拖地既事件後，今次我要穿短裙！
呢次仲唔係租，係造走架，要揀條靚靚、fit 既。
粉橙色系列，Loffy 同 Toffy 揀左 A 款，我同 Miffy 揀左 B 款。
A 款 - lace 型
B 款 - 上面好閃下面百摺(適合xxxx人士，轉移視線，嘻嘻~)
姐妹搞掂散水，Noffy 仲要等細妹。
本來諗住去秋子睇花球，但係已經收左檔囉，下次請早...
同 Miffy 返金都行個圈。
經過返間舖，細妹黎左喇。
呢個係細細妹，果陣佢仲讀緊幼稚園，而家已經咁大個。
我同 Miffy 話我地由細睇到佢大，叫佢叫我地 Aunty~
哇哈哈~
細細妹怕怕羞羞咁，我地都唔阻住佢試衫。
Miffy 陪我去信和雅景問酒店價錢。
心水酒店兩房 (6xx尺) 1000蚊，三房 (1xxx尺) 1200蚊。
之前我直接打去酒店問過，兩房 1500蚊，三房 2200蚊。
經 agent 真係平好多呢！
應該都係經佢 book 呢間架喇。
夜晚仲有節目，就係去 Lion 屋企打邊爐喇！
我最早到，好用心咁參觀，好似睇樓咁。
整緊自己屋企既人，去到人地屋企係咪都係咁既呢？
經過一晚既活動，留意住班嘩鬼既行為...
到時佢地黎我屋企...坐下好喇...
Labels: 出門酒店, 工場 E, 星期三緊, 書友仔 S, 花球
賀 CS
為慶祝舊同事榮升 CS 之喜，約哂咁多屆師兄弟姐妹出黎食餐勁既！
向鹿嗚春設宴，當然係升職果兩個請客啦！
Salt 話間野好出名架喎，不過我唔識囉。
我見識少~
岩岩個九月已經係第六屆喇。
我係第一屆個批，嘩，好老！
其實我果屆已經離開哂間公司，不過都請埋我地，真係俾面。
我果屆今晚得我到，對住差唔多有一半都唔識既人，好在都冇發毛。
食完仲向香格里拉門前拍照，扮哂野，哈。
佢地話，要將升職請上上下下食飯變為指定動作。
嘻，我有乜所謂，我點都係食果個，有 so 有 so。
哇哈哈~
Labels: 工場 E
Hae
約左 E 記班人九點鐘打邊爐。
九點...時間好難過...
差不多每個商場都行哂。
行埋裕華。
又有 d 意外發現喎。
d 中式擺設好靚，可以記住呢度，到間屋裝修好再襯下。
Labels: 一片瓦, 劃火柴, 工場 E
聚會背後
今朝要返工，約左柴柴放工行德福。
佢向德福等我，都唔黎接我放工，差幾步路之嘛...嘻嘻...
一路等、一路食，都睇住 d 雜誌，睇下 d 草圖，計下 d 尺寸，唔，好期待呀。
呢個時候去德福，當然唔會放過 IKEA 啦。
拿住把尺度度度，睇下 d 示範單位，一路改良我地既設計。
客廳、飯廳、大房都一路諗，但細房就諗都冇諗過。
柴柴話放個掛衫架同個抽濕機入去，做乾衣房。
嘩，好奢侈呀~
夜晚同 E 記既人食飯。
馬仔係咁問我係咪有野宣佈，我仲以為阿嬌話左俾佢知。
原來只係空問，不過我都宣佈左喇。
好似早得滯講，但問到唔講又講大話咁。
既然唔係 d 唔見得人既事，大大方方同大家分享囉。
散水，同 Lion 去地鐵站。
傾左好耐，就咁企向地鐵口傾。
唔講唔知原來佢咁唔鍾意呢個聚會。
俾馬仔佢地咁話太冇意思囉。
唔...都唔知點講好...
笑話一則：
叫小菜既時候，有人提議叫 d 菜。
有人諗一諗之後，竟然...
「咁叫回鍋肉囉」...
(圖片顯示有小量伴菜)
Labels: 一片瓦, 劃火柴, 工場 E
炸彈潮
又到 E 記開生日會既時候喇。
亞東同阿嬌宣佈出年結婚呀！
佢地定左日子，係 5月16日，好鄧佢地開心呢。
我未定日子，柴仔又唔向我身邊，所以冇講我都會出年結婚。
佢地班衰仔仲話我一定 lorlorlun，話下次約埋柴仔出黎俾 d 壓力佢喎。
嘻嘻，使鬼你地迫呀，柴仔不知幾自願...呵呵呵...
阿嬌講酒席好難 book ，講到我都好擔心。
點算呢？
Labels: 工場 E
幼稚園生日會
今日 E 記一伙人同我慶祝生日。
其實好似幼稚園咁，每逢有人生日，都出黎聚一聚，搞個生日會。
出黎做野，得呢幫人會係咁。
都幾開心。
仲有，今日收到 Lion 既利是呀~
Labels: 工場 E
//
30/8/10 10:39